сым бөгеттер

(Проволочные заграждения)

қарсыластың қозғалысын қиындату және оның маневрін шектеу мақсатында тікенекті және тегіс сымнан құрылатын жаяу әскерлік бөгеттер. Олар қорғаныс бекіністерін, олардың қапталдары мен аралықтарын қорғау үшін құрылады. Әдетте, С.б-нің бекіністен қашықтығы оларды атыс қаруларымен қорғау мүмкіндігімен анықталады. С.б. орында құрылатын тұрақты (сым торлар, сым қоршаулар, аспалы сым, тоқыма) және алдын ала дайындалып, құру орнына жеткізілген тасымалды (керме, кірпі, сым және таспалы шыйыршықтар, тұзақтар, аз байқалатын сым бөгеттер) болып бөлінеді. Сым торлар шахматтық ретпен қатар аралары 1,5 м, қатардағы аралықтары 3 м-ден топыраққа қағылатын 3—5 қатарлы биік қазықтардан тұрады. Қазықтардың сыртқы қатарлары бес желілі тікенек сыммен қоршалады. Аласа қазықтағы сым торлар (сүрінбе) сымнан жасалған аз байқалатын бөгеттер болып келеді. Сым қоршаулар тікенек сымның бес желісі жүргізілген қазықтардың бір қатарынан жасалады. Күшейтілген сым қоршаудың екі жағында 2—3 көлденең сым желілері бекітілген шағын қазықтары болады. Аспалы сым тастақ топырақтарда немесе қазықтар болмаған жағдайда С.б-ді орнатуға аз уақыт берілгенде қолданады. Тұзақтар қағылған қазықтарға бекітілген тегіс сымдардан жасалады. Сым және таспалы шыйыршықтар диаметрі 1,0—1,2 м арнайы шаблондардың көмегімен, оларға тікенек сым немесе таспа орау арқылы жасалады, олар созылған қалыпта ұзындығы 10 м және диаметрі 0,7—0,9 м шыйыр құрайды. Аз байқалатын бөгеттер зауыттарда диаметрі 1,0—1,5 мм тегіс сымдардан жасалады және оларды созған кезде 10  10  1,0 м мөлшердегі көлемді бөгет құрайды. Олар жаяу әскерге қарсы ғана емес, сонымен қатар дөңгелекті және шынжыр табанды машиналарға қарсы қолданылады. Тегіс сымдардан жасалатын ерекше торлар электрлендірілген бөгеттер жасау үшін қолданылады.